நீ தேடுகிற முகம் என்னுடையதில்லை

நீ வரும் வழித்தடமெங்கும்
உன் விழிகள் பரவும் எல்லைவரை
என்னை நான் நிலை நிறுத்திக் கொண்டிருக்கிறேன்... 

எதையோ தேடுவது போல்
எனக்கு முன்னும்
எனக்கு பின்னும்
உன் பார்வைகள் அலை பாய்கின்றன... 

என்னை நெருங்கி வருகிறாய்
எனக்கு நேர்கோட்டில் நிற்கிறாய் - பின்
என்னை கடந்து போகிறாய்

உதட்டோரம் ஒரு புன்னகை
உயிர் வருடும் ஒரு பார்வை
என் உலகம் இறந்து பின்
உன் உலகம் என்னுள்
உயிர்க்கும் ஒரு தருணம்

நீ கடந்த அந்த நொடியில்
நான் மீண்டும் உயிர்க்கிறேன்...

ஆனால்
எப்போதும் நீ தேடுகின்ற முகம்
என்னுடையதாக இருப்பதில்லை...
அது எனக்குள் இருக்கும்
உன்னுடைய முகம் என
பின்பொரு நாளில் கண்டு கொண்டேன்...