உனக்கும் எனக்குமான காலம் வேறு வேறு

எப்போதும் உன்னைப் பற்றிய
நினைவுகள் எனக்குள் தீ போல்
பரவிக் கொண்டிருக்கின்றன...

காற்றின் திசைகளை மீறிய - உன்
தீ-யின் அலைகள் எனக்குள்
மேக கூட்டம் போல் மோதுகின்றன...

சுடுவது போல் உணர்வுகள் - ஆனால்
ஆனந்தமாய் மிதந்து கொண்டிருக்கிறேன்...

உன்னைப் பார்க்க,
உன்னிடம் பேச,
உன்னிடம் உன்னிடம் உன்னிடம்
என என் காலம் உன்னை நோக்கி
நகர்ந்து கொண்டிருக்கிறது.

உன் பார்வைகளில் எனக்கான
நினைவுகள் உன்னிடம் உறைந்திருப்பதை
காண்கிறேன்...

ஏதோ சில முன்வினை நிகழ்வுகளால்
என்னிடம் அவ்வப்போது நீ ஸ்நேகம் காண்பித்து
என்னை விட்டு நகர்ந்து கொண்டிருக்கிறாய்...

உன்னை நோக்கி என்னை நகர்த்தும்
அதே காலம்தான் - உன்னை மெல்ல மெல்ல
என் எல்லை தாண்டி  விலக வைத்துக் கொண்டிருக்கிறது...